Prosiectau'r Fframwaith Ffyniant Cyffredin
Mae Cronfa Effaith Balchder Bro yn rhaglen ledled Prydain, a’i nod yw darparu buddsoddiad i adfer balchder bro, cefnogi cydlyniant cymunedol, a sbarduno gweithgarwch economaidd lleol trwy welliannau gweladwy, tymor byr, wedi’u harwain gan y gymuned.
Mae’r Grantiau Bach yn cyd-fynd â’r amcanion Cronfa Effaith Balchder Bro canlynol:
- Mannau cymunedol: creu, ehangu, gwella neu adfer cyfleusterau cymunedol presennol a galluogi sefydliadau cymunedol i gymryd rheolaeth neu berchnogaeth o asedau lleol sy’n werthfawr ond sydd wedi’u tanddefnyddio.
- Mannau cyhoeddus: gwella’r amgylchedd ffisegol mewn mannau cyhoeddus - mae enghreifftiau o fentrau’n cynnwys mannau gwyrdd neu sgwariau cyhoeddus newydd neu wedi’u gwella, gwella ardaloedd chwarae awyr agored, mannau chwaraeon a hamdden, gosod dodrefn stryd, celf gyhoeddus neu arwyddion.
Prosiectau
Mae Cornelly Development Trust (Amdani) yn elusen gofrestredig sy'n anelu at wneud newidiadau effeithiol a chynaliadwy i fywydau pobl.
Helpodd Grant Bach y Gronfa Effaith Balchder Bro i ariannu gwaith tirlunio i droi'r ardal awyr agored segur yn ofod tyfu bywiog, cymunedol.
Gosodwyd grisiau newydd i sicrhau mynediad diogel, a gosodwyd slabiau patio i greu ardal eistedd groesawgar, gan hyrwyddo rhyngweithio cymdeithasol a mwynhad.
Gosodwyd planwyr mawr sy'n caniatáu i breswylwyr gynhyrchu bwyd, gan hyrwyddo iechyd, lles a dysgu parhaus.
Bydd y bwyd a dyfir yn helpu i gefnogi trigolion yr effeithir arnynt gan gostau byw cynyddol, gan gynnig ffrwythau, llysiau a pherlysiau ffres hanfodol i’r rhai sy’n cyfrannu at y pantri.
Nod Grant Bach y Gronfa Effaith Balchder Bro yw helpu i ariannu gwaith i ddisodli soffitiau a ffasgiâu a oedd wedi mynd rhwng y cŵn a’r brain ac yn bryder diogelwch posibl.
Bydd y gwelliannau’n helpu i ddiogelu’r cyfleuster cymunedol poblogaidd yn y dyfodol, gan sicrhau y gall barhau i ddarparu lle diogel a chroesawgar i breswylwyr, grwpiau cymunedol ac ymwelwyr.
Helpodd Grant Bach y Gronfa Effaith Balchder Bro i ariannu gwaith i ailosod ffenestri a drysau'r pafiliwn a oedd wedi mynd rhwng y cŵn a’r brain ac yn dechrau achosi pryderon diogelwch, ynghyd â bod yn niweidiol o ran effeithlonrwydd ynni.
Mae'r ffenestri a'r drysau newydd yn edrych yn well, a bydd y gwelliannau’n helpu i ddiogelu’r cyfleuster at y dyfodol, gan sicrhau y gall barhau i ddarparu lle diogel a chroesawgar i breswylwyr, grwpiau cymunedol ac ymwelwyr.
Mae Billy's Gym and Wellness Centre yn gyfleuster ym Maesteg sy'n gweithio'n agos gyda meddygfeydd lleol, ysgolion a sefydliadau cymunedol i gefnogi plant a allai wynebu rhwystrau i fynediad at weithgareddau prif ffrwd.
Eu nod yw cynyddu mynediad at weithgarwch corfforol cynhwysol, diogel ac ymgysylltiedig, gan alluogi plant o bob gallu, gan gynnwys y rhai ag amhariad ar eu golwg ac anghenion ychwanegol, i gymryd rhan mewn sesiynau strwythuredig i helpu i wella rheolaeth emosiynol, lleihau gorbryder, a chynyddu hyder.
Bydd Grant Bach y Gronfa Effaith Balchder Bro yn helpu i brynu eitemau arbenigol, gan gynnwys wal ddringo gynhwysol ac offer synhwyraidd, i helpu i greu amgylchedd unigryw, hygyrch i ddefnyddwyr.
Wedi'i sefydlu yn 2010, mae Clwb Bocsio Dreigiau Cwm Ogwr wedi'i leoli yng nghanol Cwm Ogwr. Mae'r clwb yn croesawu bocswyr o bob oedran, yn rhoi lle i ddosbarthiadau menywod yn unig, ac wedi meithrin rhai o bencampwyr Cymru.
Dioddefodd y gampfa bocsio ddifrod mawr i'r nenfwd yn dilyn cyfnod o dywydd gwael ac roedd yna bryderon iechyd a diogelwch.
Gwnaeth y Gronfa Effaith Balchder Bro alluogi’r clwb i benodi contractwr i gynnal y gwaith adnewyddu hanfodol.
Digwyddodd y gwaith y tu allan i’r tymor bocsio, gan darfu cyn lleied â phosibl
ar amserlenni dosbarthiadau.
Mae'r nenfwd newydd yn edrych yn well, gan sicrhau bod y gofod mor ddiogel â phosibl, ac mae’n cyfrannu at effeithlonrwydd ynni.
Mae Men's Shed Caerau yn elusen sy'n canolbwyntio ar leihau ynysu cymdeithasol gan hefyd gynorthwyo'r gymuned.
Wedi'i sefydlu yn 2017, gall cyfranogwyr y fenter gymryd rhan mewn gweithgareddau fel gwaith coed a garddio i ddarparu cyfle rhyngweithio cymdeithasol.
Gwnaethant gais am gyllid i ehangu gofod y gweithdy i gynnwys meinciau gwaith hygyrch sy'n addas ar gyfer defnyddwyr cadair olwyn, offer trydanol a nodweddion diogelwch angenrheidiol.
Mae’r gwelliannau wedi cynyddu nifer yr aelodau sy'n gallu cymryd rhan ar unrhyw adeg ac yn cefnogi eu cenhadaeth o leihau ynysu cymdeithasol.
Mae Canolfan Gymunedol Talbot yn gwasanaethu sbectrwm eang o'r boblogaeth leol, gan ddarparu ar gyfer ystod o grwpiau o bob oedran.
Mae plant ifanc a'u teuluoedd yn cymryd rhan yn rheolaidd mewn sesiynau plant a babanod, tra bod preswylwyr hŷn yn elwa o fentrau fel y ganolfan gynnes a'r ganolfan gymunedol.
Defnyddiwyd y grant CEBB i ddisodli'r drysau blaen gyda dewisiadau ynni-effeithlon sy'n parchu hanes yr adeilad, yn lleihau’r gwres sy’n cael ei golli, yn amddiffyn rhag tywydd garw, ac yn sicrhau bod y ganolfan yn parhau i gydymffurfio â rheoliadau cadwraeth.
Gwnaeth hefyd eu galluogi i osod cyfleusterau fideo-gynadledda, gan alluogi'r ganolfan i gynnal cyfarfodydd ar-lein a sesiynau TGCh addysgiadol i breswylwyr.
Mae Canolfan Gymunedol Bryncethin yn rhan bwysig o'r gymuned, ac mae'n cael ei defnyddio gan grwpiau lleol y rhan fwyaf o ddiwrnodau.
Mae'r adeilad yn cynnal gweithgareddau cymunedol gan gynnwys banc bwyd, caffi cymunedol, canolfan gynnes a chyrsiau lles y GIG.
Helpodd y cyllid y ganolfan i wneud atgyweiriadau hanfodol i oleuadau a llwybrau. Mae'r llwybr bellach wedi gwella hygyrchedd i ddefnyddwyr cadair olwyn a phramiau. Mae'r goleuadau solar yn cynnig ymdeimlad o ddiogelwch i holl ddefnyddwyr y rhodfa.
Mae'r gwelliannau hyn wedi caniatáu i'r ganolfan ymestyn ei gwasanaethau a chynyddu nifer y defnyddwyr yn y cyfleuster cymunedol hanfodol hwn, a byddant yn sicrhau ei bod yn parhau i fod yn ganolfan hygyrch a diogel i breswylwyr.
Mae Clwb Rygbi Mynyddcynffig yn glwb cymunedol cynhwysol, gyda dros 450 o chwaraewyr cofrestredig a mwy na 60 o wirfoddolwyr rheolaidd. Ochr yn ochr â chwaraeon, mae'r clwb yn ofod croesawgar i grwpiau cymunedol lleol, ac mae'n croesawu grwpiau anabledd, dementia ac elusennau yn rheolaidd, gan ddarparu lle cynnes, diogel i bobl sy'n byw gyda bregusrwydd.
Mae'r clwb eisoes yn elwa o baneli solar, ond roedd potensial ar gyfer mwy o arbedion ynni trwy osod batris solar ychwanegol.
Gwnaeth cynllun Grant Bach CEBB alluogi'r clwb i benodi contractwr lleol i osod y batris heb fawr o darfu ar amserlen arferol y grwpiau cymunedol.
Gall y clwb nawr edrych ymlaen at ail-fuddsoddi'r arian sy’n cael ei arbed ar eu costau rhedeg misol yn y clwb ei hun a'r gwasanaethau maen nhw'n eu darparu.
Mae'r cwrs dŵr yn ardal werdd sefydledig o harddwch naturiol, gyda choed ynn, derw, ffawydd a sycamorwydd, a thwf cynefin aeddfed, sefydledig. Mae'n ardal boblogaidd gyda cherddwyr, aelodau o'r gymuned, teuluoedd, a cherddwyr cŵn.
Mae'r trigolion yn mwynhau cynnal a chadw'r cwrs dŵr ac yn dod at ei gilydd i’w gynnal ar sail wirfoddol.
Roedd angen ailddatblygu'r bont bren oherwydd oedran, pydredd ac arwynebau llithrig. Aeth cyllid y Cynllun Grant Bach CEBB tuag at gostau tynnu'r bont bresennol, ailosod y llwybr a gosod rheilen law. Mae'r llwybr brics newydd yn ateb deniadol, gwydn a hirhoedlog, tra'n sicrhau hygyrchedd a diogelwch i ddefnyddwyr.
Gwnaeth cyllid gan y Gronfa Effaith Balchder Bro helpu i wneud gwahaniaeth gwirioneddol yn YMCA Porthcawl.
Diolch i'r grant, mae'r YMCA wedi gallu newid y boeler 14 oed am system newydd, fwy effeithlon o ran ynni.
Mae hyn yn golygu lle cynhesach, mwy croesawgar a mwy cyfforddus i'r bobl niferus sy'n defnyddio'r YMCA bob wythnos – o fabanod a phobl ifanc i breswylwyr hŷn, gyda thua 25 o grwpiau gweithgareddau yn defnyddio'r adeilad ochr yn ochr â gweithgareddau ieuenctid rheolaidd.
Mae'r cyllid wedi helpu i wneud gwelliant hanfodol a fydd o fudd i ymwelwyr a staff, yn enwedig wrth i fisoedd oerach yr hydref a'r gaeaf agosáu.
Mae cyllid o'r Gronfa Effaith Balchder Bro wedi helpu i wella diogelwch ym maes parcio Cyngor Tref Pencoed yn sylweddol drwy osod goleuadau colofn, gan fynd i'r afael â phryderon a godwyd gan drigolion.
Mae'r goleuadau’n sicrhau profiad mwy diogel i ddefnyddwyr y maes parcio, yn enwedig yn y nos ac yn ystod y gaeaf.
Mae llawer o drigolion oedrannus yn defnyddio'r maes parcio i gael mynediad i ganol y dref a'r neuadd les gyda'r nos, gyda rhai’n dweud nad oedden nhw’n gallu dod o hyd i'w cerbyd, ac eraill yn poeni am beryglon baglu cyn gosod y goleuadau.