Casgliadau gwastraff ac ailgylchu gŵyl y banc: Ni fydd casgliadau ar Ddydd Llun 25 Awst 2025. Bydd y casgliadau’n digwydd ddiwrnod yn hwyrach na’r arfer ar gyfer yr wythnos tan ddydd Sadwrn 30 Awst 2025.
Strategaeth Garbon Sero Net
Mae Llywodraeth Cymru wedi deddfu ar gyfer Cymru Sero Net erbyn 2050, gyda’r sector cyhoeddus yn arwain trwy esiampl i gyflawni Sero Net erbyn 2030.
Fel sefydliad, rydym wedi ymrwymo i gyflawni’r targed Sero Net erbyn 2030, ac yn cydnabod y rôl arweiniol ar lefel ehangach, o safbwynt galluogi busnesau a chymunedau’r sir i gyflawni Sero Net.
Gwnaethom ein datganiad o ran ein hargyfwng hinsawdd ein hunain ym Mehefin 2020, a sefydlwyd ein rhaglen Ymateb i’r Argyfwng Hinsawdd.
Strategaeth Garbon Sero Net 2030 Pen-y-bont ar Ogwr yw’r cam strategol cychwynnol o safbwynt cyflawni’r ymrwymiad hwn.
Mae’n bwysig nodi nad y Strategaeth hon fydd yr unig sbardun ar gyfer cyflawni Sero Net. Bydd yn rhan annatod o Gynllun Corfforaethol a Chynllun Llesiant y Cyngor, a bydd polisïau, strategaethau a chynlluniau parhaus yn adlewyrchu’r ymrwymiad i gyrraedd Sero Net. Bydd hyn yn sicrhau bod y sefydliad cyfan yn ei groesawu.
Niwtral o ran Carbon erbyn 2030
Mae niwtraliaeth garbon neu Garbon Sero Net yn golygu cydbwyso’r allyriadau nwyon tŷ gwydr yr ydym yn eu cynhyrchu â nifer y nwyon yr ydym yn eu tynnu o’r atmosffer.
Ar hyn o bryd, mae'r byd yn cynhyrchu mwy o allyriadau nwyon tŷ gwydr nag y mae'n eu hamsugno, sy'n achosi cynhesu byd-eang a newid yn yr hinsawdd.
Beth yw Ôl Troed Carbon Pen-y-bont ar Ogwr?
Comisiynodd y Cyngor asesiad ôl troed carbon ar gyfer ei weithrediadau ei hun.
- Cyfanswm Allyriadau Carbon Cyngor Pen-y-bont ar Ogwr 2019/20: 90,241 tunnell CO2e
Mae hyn yn tua 0.23% o gyfanswm allyriadau nwyon tŷ gwydr Cymru.
Cyfrifwyd ôl troed carbon y Cyngor o 2019/20 gan ddefnyddio methodoleg Adrodd am Garbon Llywodraeth Cymru. Mae Adroddiadau Carbon Llywodraeth Cymru yn edrych ar allyriadau sy’n cael eu priodoli i’r tri chategori neu gwmpas:
Allyriadau Uniongyrchol – yw’r rheiny sy’n deillio o sefydliad yn ei ffynhonnell, er enghraifft drwy wresogi adeiladau neu o bibellau gwacáu cerbydau.
Allyriadau Anuniongyrchol – yw’r rheiny sy’n dod yn bennaf o drydan a ddefnyddir yn ein gweithgareddau ond lle mae’r cynhyrchiant a’r allyriadau cysylltiedig mewn mannau eraill.
Yr holl allyriadau anuniongyrchol eraill – yw’r rheiny sy’n dod yn bennaf o drydan a ddefnyddir yn ein gweithgareddau ond lle mae’r cynhyrchiant a’r allyriadau cysylltiedig mewn mannau eraill.
Ein Hymrwymiadau
- Bydd y Cyngor yn dangos arweinyddiaeth ac ymrwymiad i gyflawni Strategaeth Garbon Sero Net Pen-y-bont ar Ogwr 2030, i fynd i'r afael â'r Argyfwng Hinsawdd fel y datganwyd gan Lywodraeth Cymru, y Senedd a'r Cyngor.
- Bydd y Cyngor yn integreiddio ymddygiadau carbon isel a di-garbon ledled y sefydliad a bydd effaith carbon yn dod yn ystyriaeth allweddol ym mhob penderfyniad strategol.
- Bydd y Cyngor yn datgarboneiddio ei ystâd adeiledig erbyn 2030 gyda ffocws cryf ar effeithlonrwydd ynni, gwresogi carbon isel a chynhyrchu ynni adnewyddadwy ar y safle.
- Bydd y Cyngor yn ymgymryd â rhaglen adnewyddu’r fflyd i gerbydau allyriadau isel iawn, fel bod pob cerbyd yn ULEV erbyn 2030.
- Bydd y Cyngor yn hyrwyddo dewisiadau teithio llesol a charbon isel drwy ei holl weithrediadau ei hun.
- Bydd y Cyngor yn datgarboneiddio ei weithgarwch caffael drwy ymgysylltu â’r gadwyn gyflenwi, cefnogi a gorfodi cyflenwyr i ddatgarboneiddio, a datblygu arferion caffael lleol cynaliadwy.
- Bydd y Cyngor yn sicrhau bod ei ddaliadau tir yn cael eu datblygu a'u cynnal i gefnogi amcanion Sero Net drwy lefelau uchel o atafaelu carbon a bioamrywiaeth.
- Bydd y Cyngor yn datgarboneiddio ei ffrydiau gwastraff drwy roi terfyn ar ddefnydd tirlenwi a mabwysiadu diwylliant ailddefnyddio ochr yn ochr â dulliau cynaliadwy o gael gwared ar wastraff.