Annog preswylwyr i 'Dreulio’r haf yng nghanol eich tref' a mwynhau cyfres o ddigwyddiadau cyhoeddus am ddim

Mae ymgyrch flynyddol y cyngor i annog pobl i 'Dreulio'r haf yng nghanol eich tref' wedi cychwyn yr wythnos hon.

Gan dynnu sylw at raglen o ddigwyddiadau am ddim sy'n cael eu cynnal gydol misoedd yr haf, nod yr ymgyrch yw hybu ymgysylltiad cymunedol a chefnogi busnesau lleol yng nghanol trefi Pen-y-bont ar Ogwr, Maesteg a Phorthcawl, a reolir gan y cyngor.

Gall preswylwyr edrych ymlaen at gyfres o ddigwyddiadau am ddim gan gynnwys: 

• Gorymdaith Diwrnod y Lluoedd Arfog a gynhelir gan Gyngor Tref Pen-y-bont ar Ogwr
• 'Marchnadoedd Stryd yr Haf' cwmni Green Top Markets yng nghanol trefi Pen-y-bont ar Ogwr, Maesteg a Phorthcawl
• Gŵyl Morlun Awen ym Mhorthcawl
• Dathliadau Diwrnod VE, a gynhelir gan Gyngor Tref Porthcawl
• Diwrnod Hwyl i'r Teulu ym Mharc Lles Maesteg, a gynhelir gan Gyngor y Dref
• Ras 5k a 10k Ceidwad y Lofa, a gynhelir gan Gyngor Tref Maesteg
• 10k Brecon Carreg Porthcawl

Er mwyn denu ymwelwyr i ganol y trefi, sydd hefyd yn cynnig amrywiaeth eang o 'fwytai cyrchfan' a masnachwyr a busnesau annibynnol, mae'r cyngor wedi ymestyn ei gynnig parcio am ddim mewn dau faes parcio canol tref a gynhelir gan y cyngor ym Mhen-y-bont ar Ogwr a Phorthcawl, lle gall ymwelwyr barhau i barcio am ddim am y tair awr gyntaf ym maes parcio aml-lawr Rhiw ym Mhen-y-bont ar Ogwr a rhwng hanner dydd a 3pm yn John Street ym Mhorthcawl.

Gall pobl sy'n ymweld â chanol tref Pen-y-bont ar Ogwr ar ôl 6pm barcio am ddim yn y maes parcio awyr agored mawr yn Brackla Street (y tu ôl i Wilkinson's) a meysydd parcio yn Tremains Road, Tondu Road ac yng Nghanolfan Bywyd Pen-y-bont ar Ogwr.

Mae meysydd parcio sy'n cael eu rhedeg gan y cyngor yn John Street a Hillsboro Place ym Mhorthcawl yn rhad ac am ddim i'w defnyddio ar ôl 6pm, ac mae parcio am ddim hefyd ar gael ar hyd glan y môr.

Mae parcio llawn amser am ddim hefyd ar gael yng nghanol tref Maesteg ym maes parcio aml-lawr Ffordd Llynfi.

Mae Wi-Fi am ddim hefyd ar gael yng nghanol y trefi ar draws Bwrdeistref Sirol Pen-y-bont ar Ogwr gyda'r nod o gynyddu cysylltedd ymhlith trigolion, busnesau ac ymwelwyr.

Mae'r gwasanaeth am ddim ar gael mewn pedair canol tref sef Pen-y-bont ar Ogwr, Porthcawl, Maesteg a Phen-coed. Er mwyn cysylltu, bydd angen i unigolion chwilio eu gosodiadau rhwydwaith Wi-Fi am "BCBC Free Wi-Fi" ac yna bydd angen iddynt nodi eu cyfeiriad e-bost i ddechrau.