Casgliadau gwastraff ac ailgylchu gŵyl y banc: Ni fydd casgliadau ar Ddydd Llun 25 Awst 2025. Bydd y casgliadau’n digwydd ddiwrnod yn hwyrach na’r arfer ar gyfer yr wythnos tan ddydd Sadwrn 30 Awst 2025.
Arolygwyr Estyn yn dathlu ethos cadarnhaol Ysgol Gynradd Maes yr Haul
Dydd Mercher 14 Mai 2025
Mae ethos sy'n hyrwyddo lles a pharch ar y ddwy ochr rhwng disgyblion a staff wedi cael ei amlygu mewn arolygiad diweddar gan Estyn o Ysgol Gynradd Maes yr Haul, sydd wedi'i lleoli yn Broadlands, Pen-y-bont ar Ogwr.
Mae'r ysgol gynradd wedi cael ei chanmol am ymddygiad eithriadol ei dysgwyr, ynghyd â'r parch amlwg gan y disgyblion tuag atynt eu hunain, ei gilydd, aelodau o staff, ac ymwelwyr.
Mae'r ysgol gynradd wedi cael ei chanmol ymhellach gan arolygwyr am gefnogi staff i ddatblygu sgiliau arwain, y cyfleoedd sydd ar gael i ddysgwyr ymgymryd â rolau arweinyddiaeth, yn ogystal â gallu'r ysgol i ddarparu ar gyfer anghenion amrywiol disgyblion, gan gynnwys dysgwyr ag anghenion dysgu ychwanegol. Nododd adroddiad Estyn hefyd y ffordd y mae perthynas agos â phartneriaid allanol yn cefnogi teuluoedd sydd angen help ychwanegol.
“Rwy'n falch iawn bod Estyn wedi cydnabod gwaith eithriadol ac ymrwymiad cryf ein staff, ein tîm arwain, ein llywodraethwyr a'n rhieni i ddarparu'r gorau i bob un o’n disgyblion ym Maes yr Haul. “Fel tîm, mae pawb yn ymdrechu i sicrhau ein bod yn lle rhagorol i'n holl ddisgyblion, gan gynnal ethos cadarnhaol gyda ffocws uchel ar les a sicrhau cynnydd cryf i'n holl ddisgyblion waeth beth fo'u cefndir neu anghenion unigol. Mae staff yn falch o'u hysgol ac yn gweithio'n galed i greu amgylchedd ysgogol a meithringar lle gall pob disgybl ffynnu a chyrraedd ei lawn botensial ar draws ystod eang o wahanol sgiliau a diddordebau. “Rwy'n arbennig o falch bod Estyn wedi cydnabod ein hanes cryf o gefnogi athrawon dan hyfforddiant trwy eu Haddysg Gychwynnol i Athrawon ac o ddatblygu sgiliau arwain ein hathrawon. Nhw yw athrawon ac arweinwyr ysgol y dyfodol, ac mae'n ymrwymiad a chyfrifoldeb sy'n bwysig iawn i mi. “Diolch yn ddiffuant i bawb sy'n ymwneud â theulu Maes yr Haul am eu hymrwymiad di-baid i wneud eu gorau glas i'n disgyblion, nawr ac i’r dyfodol.”
“Am adroddiad Estyn gwych – dylai staff a disgyblion Ysgol Gynradd Maes yr Haul fod yn hynod falch. “Mae'r ffaith bod lles a pharch yn cael cymaint o flaenoriaeth yn yr ysgol yn darparu sylfaen wych i adeiladu popeth arall arni. “Da iawn bawb! Ardderchog!”