Ceisio barn ar Uwchgynllun Adfywio Glannau Porthcawl

Mae ymateb cychwynnol y cyhoedd i'r cynigion wedi bod yn anhygoel. Nawr, mae angen i bobl leol ddod i ystyried yr uwchgynllun terfynol, a'i helpu i gymryd ei ffurf derfynol cyn iddo gael ei gyflwyno fel cais cynllunio. Rwy'n credu y gall y mwyafrif o bobl weld sut mae'r cyngor a Llywodraeth Cymru wedi gwrando ar adborth o ymgynghoriadau blaenorol, ac wedi cyflwyno nifer o newidiadau sylweddol i geisio dod o hyd i gydbwysedd realistig sy'n adlewyrchu anghenion lleol tra hefyd yn cynnig dyfodol hirdymor, cynaliadwy i Borthcawl. Mae ein cynigion yn cynnwys cynlluniau cyffrous ar gyfer creu pwll nofio Lido newydd sbon ac ardal adloniant awyr agored yn Llyn Halen sy'n cynnwys reidiau ffair newydd, ehangiad enfawr o Barc Griffin gydag ardal gemau aml-ddefnydd a choridor gwyrdd llawn nodweddion newydd, pad sblashio, golff mini, trac pwmpio, parciau poced, llwybrau ffitrwydd, gerddi cymunedol ac ardaloedd chwarae i blant, i gyd wedi'u cysylltu gan rwydwaith o lwybrau a theithiau sy'n addas ar gyfer cerddwyr a beicwyr. Rydym yn cynnig cyfleoedd ar gyfer siopau, caffis, bwytai, bariau a chiosgau newydd yn ogystal ag adeiladau a phafiliynau y gellir eu defnyddio gan grwpiau cymunedol, safle ar gyfer cartrefi modur a charafanau teithiol, a digon o fannau agored sy'n addas ar gyfer cynnal ffeiriau tymhorol, marchnadoedd, gwyliau a digwyddiadau. Mae'r uwchgynllun yn annog defnyddio Traeth Coney a thraeth Sandy Bay ar gyfer digwyddiadau newydd, gydag amddiffynfeydd arfordirol grisiog yn cynnig gwell amddiffyniad yn ogystal â gwell mynediad i'r tywod, ac mae'n cynnwys creu ardal 'bowlen' newydd wedi'i thywarchu yn ogystal â chynefinoedd twyni wedi'u hadfer yn Nhrwyn Rhych a fydd yn cael eu defnyddio at ddibenion addysgol a hamdden. Rydym wedi lleihau elfen tai yr uwchgynllun i oddeutu 980 o gartrefi, wedi gostwng uchder adeiladu ag 20 y cant, ac wedi ymrwymo tuag at wneud hyd at 50 y cant o'r tai yn fforddiadwy ynghyd â pholisi 'pobl leol yn gyntaf' ar ddeiliadaethau. Rwy'n gwybod bod gan bobl gwestiynau ynglŷn â hyn a materion eraill, fel parcio ceir neu effaith bosibl tai newydd ar seilwaith lleol. Mae'r rhain i gyd wedi'u hystyried yn ofalus ac yn cael eu cynnwys yn ein hatebion i gwestiynau cyffredin, a bydd arbenigwyr adfywio hefyd ar gael i roi eglurhad a sicrwydd pellach yn y digwyddiad cyhoeddus a gynlluniwyd ar gyfer Hi Tide Inn. Bydd cyflawni amcanion yr uwchgynllun yn broses hirdymor sy'n gofyn am ganiatâd cynllunio, cyllid priodol a phartneriaid cyflawni, ond rydym wedi ei gynllunio fel ei fod yn parhau i fod mor gredadwy a realistig ag y mae'n uchelgeisiol. Dyma'ch cyfle i helpu i lunio'r cynlluniau, a'u gwireddu.