Cyngor i ymgynghori ar ganllawiau cyfleusterau awyr agored newydd ar gyfer datblygiadau tai arfaethedig

Mae'r Cabinet wedi cymeradwyo ymgynghoriad cyhoeddus ar y Canllawiau Cynllunio Atodol (CCA) drafft ar gyfer Cyfleusterau Hamdden Awyr Agored, sy'n darparu cyfarwyddyd cynllunio ar gyfer mannau hamdden awyr agored a chyfleusterau sy'n gysylltiedig â datblygiadau preswyl newydd. 

Mae'r CCA yn cynnig arweiniad pellach ar y Polisi Darparu Cyfleusterau Hamdden Awyr Agored o'r Cynllun Datblygu Lleol newydd, a fabwysiadwyd ym mis Mawrth 2024. 

Mae'r polisi yn ei gwneud yn ofynnol i ddatblygwyr ddarparu swm penodol o ofod hamdden i gyd-fynd â maint y datblygiad tai arfaethedig.  Mae hyn yn sicrhau nad oes gormod o bwysau ar gyfleusterau cyhoeddus presennol, a bod cymunedau cynaliadwy hirdymor yn cael eu creu, lle gall pawb gael mynediad at fannau hamdden a chyfleusterau o safon.  

Mae'r CCA wedi'i alinio â'r safonau 'Meysydd Chwarae Cymru', sydd wedi dod yn feincnod a argymhellir ar gyfer darparu gofod hamdden a chyfleusterau.  

Mae'r canllawiau’n canolbwyntio'n bennaf ar bum math o weithgaredd hamdden, ac maent yn cynnwys cymorth o ran eu dylunio, dyrannu gofod mewn perthynas â maint y datblygiad, yn ogystal â chymorth costio. Amlinellir yr amrywiaeth o gyfleusterau isod:

• Caeau chwarae (1.2 hectar fesul 1,000 o bobl), yn cynnwys ardaloedd sydd wedi'u marcio ar gyfer gweithgareddau fel pêl-droed, rygbi'r undeb/cynghrair a chriced.
• Chwaraeon awyr agored eraill nad ydynt yn digwydd ar gae (1.6 hectar fesul 1,000 o bobl), megis cyrtiau tenis, lawntiau bowlio a thraciau athletau.
• Ardaloedd chwarae gyda chyfarpar (0.25 hectar fesul 1,000 o bobl).
• Darpariaeth awyr agored arall (0.3 hectar fesul 1,000 o bobl), sy'n cyfeirio at gyfleusterau chwaraeon nad ydynt wedi'u cynnwys yn y categorïau uchod, megis ardaloedd gemau aml-ddefnydd a pharciau sglefrio.
• Darpariaeth rhandiroedd (0.2 hectar fesul 1,000 o bobl).

Mae'r CCA yn trosi hectarau fesul 1,000 o bobl yn fetrau sgwâr fesul annedd i alluogi swyddogion a datblygwyr i gyfrifo'r gofyniad gofodol ar y safle. 

Mewn achosion lle nad yw'r datblygiad arfaethedig yn gallu darparu ar gyfer y swm gofynnol o ofod hamdden ar y safle, gellir defnyddio cyfraniadau ariannol gan y datblygwr - yn cyfateb i'r gost o ddarparu'r cyfleusterau angenrheidiol ar y safle - i gefnogi neu wella'r ddarpariaeth mewn mannau eraill yng nghyffiniau'r datblygiad.  

Yn ogystal, mae'r CCA yn helpu i gyfrifo costau cynnal cyfleusterau ar y safle ac oddi ar y safle dros gyfnod o 25 mlynedd.  Bydd hyn yn helpu’r awdurdod lleol wrth geisio cyfraniadau cynllunio i dalu am gost darparu a chynnal a chadw cyfleusterau hamdden ledled y fwrdeistref sirol.