Datgelu cynlluniau wedi'u diweddaru ar gyfer Ysgol Gynradd newydd Mynydd Cynffig

Mae cynlluniau wedi'u diweddaru ar gyfer Ysgol Gynradd Mynydd Cynffig wedi'u cyflwyno i sicrhau ymhellach bod yr ailddatblygiad yn cyflawni'r safonau uchaf o ran addysg, cynaliadwyedd a budd cymunedol tra'n ymgorffori adborth gan drigolion.

Mae'r cais cynllunio yn cael ei ystyried ar hyn o bryd gan yr Awdurdod Cynllunio Lleol ac mae'r newidiadau yn adlewyrchu sylwadau a dderbyniwyd yn ystod yr ymgynghoriad ac yn cyd-fynd â'r canllawiau cynllunio ac amgylcheddol diweddaraf.  

Mae’r newidiadau allweddol yn cynnwys:

•    Mesurau acwstig gwell – Bydd ffensys acwstig yn cael eu gosod o amgylch ffin yr ysgol, a bydd planhigion yn cael eu plannu o amgylch y cae chwaraeon pob tywydd. Mae asesiadau amgylcheddol wedi cadarnhau y bydd y lefelau sŵn a ragwelir yn aros o fewn terfynau derbyniol.

•    Cae chwaraeon pob tywydd – Bydd y cae nawr yn cael ei adeiladu heb lifoleuadau, mewn ymateb i adborth lleol ac ystyriaethau amgylcheddol.

•    Gwelliannau ecolegol – Mae mesurau lliniaru a phlannu ecolegol ychwanegol wedi'u hymgorffori i gefnogi bioamrywiaeth, gan gynnwys amddiffyniadau ar gyfer rhywogaethau fel pathewod a nadroedd defaid.

Byddai'r adeilad deulawr newydd yn disodli safle’r adran iau presennol, gan ddod â phob grŵp blwyddyn at ei gilydd ar un campws. Wedi'i gynllunio i fod Carbon Sero-net ar waith, bydd yr ysgol yn cynnwys amgylcheddau dysgu modern gan gynnwys sgwâr dysgu dan do, prif neuadd, neuadd stiwdio, ardaloedd chwarae awyr agored, a chaeau pob tywydd.

Mae cyfleusterau fel storio beiciau, mannau gwefru cerbydau trydan, a rhandiroedd diogel gyda 26 o leiniau unigol hefyd wedi'u cynnwys, ochr yn ochr â chynllun tirlunio sylweddol.  Bydd cyfleusterau chwaraeon a neuadd yr ysgol ar gael i'w defnyddio gan grwpiau a sefydliadau cymunedol.