Grantiau gwerth hyd at £10,000 ar gael i gefnogi digwyddiadau canol tref

Gallai trefnwyr digwyddiadau dderbyn grantiau hyd at £10,000 i helpu i ddod â digwyddiadau newydd cyffrous i ganol trefi Pen-y-bont ar Ogwr, Maesteg, Pencoed a Phorthcawl.

Mae tîm Adfywio'r cyngor yn gwahodd ceisiadau i'w Gronfa Digwyddiadau Canol Trefi, sy'n cefnogi digwyddiadau sy'n denu ymwelwyr, cynyddu nifer yr ymwelwyr, rhoi hwb i fusnesau lleol ac arddangos diwylliant a hunaniaeth unigryw pob tref.

Gall y gronfa dalu hyd at 50 y cant o gostau digwyddiadau cymwys, ac eithrio TAW, ar gyfer digwyddiadau a gynhelir rhwng 1 Tachwedd 2026 a 30 Medi 2027.

Bydd blaenoriaeth yn cael ei roi i ddigwyddiadau newydd a'r rhai sydd â photensial sylweddol ar gyfer twf. Gall trefnwyr digwyddiadau presennol hefyd wneud cais os gallant ddangos sut y byddai cyllid yn eu helpu i ehangu a gwella eu digwyddiad, megis trwy gynyddu capasiti, cyflwyno atyniadau newydd neu ddatblygu gweithgareddau cyflenwol.

Mae'r costau cymwys yn cynnwys llogi offer, llwyfannu, adloniant, diogelwch, stiwardio, cymorth cyntaf, cau ffyrdd, hysbysebu a marchnata.

Rhaid i ddigwyddiadau gael eu cynnal yng nghanol trefi Pen-y-bont ar Ogwr, Maesteg, Pencoed neu Borthcawl a dangos sut y byddant yn denu ymwelwyr o'r tu hwnt i'r ardal gyfagos. Bydd angen i ymgeiswyr hefyd ddarparu cynllun a chyllideb manwl am y digwyddiad, ynghyd â chynigion sy'n amlinellu sut y bydd y digwyddiad yn cael ei hyrwyddo a'i effaith yn cael ei werthuso.

Dywedodd y Cynghorydd Colin Davies, yr Aelod Cabinet dros Adfywio a Thai: "Mae digwyddiadau yn chwarae rhan hanfodol wrth ddod â'n canol trefi yn fyw, gan roi mwy o resymau i bobl ymweld, archwilio busnesau lleol a mwynhau popeth sydd gan ein cymunedau i'w gynnig.

"Gall y cyllid hwn helpu trefnwyr i droi syniadau creadigol yn brofiadau cofiadwy, gan adeiladu ar ddigwyddiadau llwyddiannus a denu hyd yn oed mwy o bobl i Ben-y-bont ar Ogwr, Maesteg a Phorthcawl.

"Rydym yn awyddus i glywed gan drefnwyr sydd â syniadau uchelgeisiol a all gael effaith wirioneddol, ac rydym yn annog unrhyw un sydd â diddordeb i gysylltu â ni i ddarganfod mwy."

Bydd ceisiadau yn cael eu hasesu ar sail y cyntaf i'r felin, yn amodol ar y cyllid sydd ar gael.

Rhaid i drefnwyr sicrhau cymeradwyaeth grant ffurfiol cyn ysgwyddo unrhyw gostau y maent am eu hawlio a rhaid iddynt ddychwelyd eu dogfennaeth dderbyn cyn bwrw ymlaen â'r prosiect a ariennir. Fel arfer, telir grantiau ar ôl y digwyddiad, unwaith y bydd tystiolaeth o wariant ac adroddiad gwerthuso terfynol wedi'u cyflwyno.

Rhaid i ymgeiswyr llwyddiannus hefyd gael yr holl ganiatâd a thrwyddedau angenrheidiol ac ymgysylltu â Grŵp Cynghori Diogelwch Digwyddiadau Pen-y-bont ar Ogwr.

I ofyn am fanylion ymgeisio neu drafod cymhwysedd, e-bostiwch dîm Adfywio Cyngor Bwrdeistref Sirol Pen-y-bont ar Ogwr.