Mae Gŵyl Lluoedd Pen-y-bont ar Ogwr yn dod â phlant y lluoedd ynghyd ledled y fwrdeistref sirol.
Dydd Mercher 02 Gorffennaf 2025
Dychwelodd Gŵyl Lluoedd Pen-y-bont ar Ogwr i’r fwrdeistref sirol yr wythnos diwethaf, i ddod â phlant y lluoedd a'u teuluoedd at ei gilydd a chynnig cymorth iddynt.
Ymunodd Hyrwyddwr Lluoedd Arfog y cyngor, y Cynghorydd Martyn Jones, a Maer Bwrdeistref Sirol Pen-y-bont ar Ogwr, y Cynghorydd Huw David, â phlant y lluoedd o ysgolion cynradd y fwrdeistref, tra ymunodd y Dirprwy Faer, Heidi Bennett, â disgyblion ysgolion uwchradd yn y digwyddiad, a gafodd ei gynnal dros ddau ddiwrnod yng Nghanolfan Milwyr wrth Gefn Pen-y-bont ar Ogwr (Pencadlys Cwmni 160 REME) yn Llidiard.
Cymerodd plant ran mewn amrywiaeth o weithgareddau hwyliog a diddorol, gan gynnwys cwrs rhwystrau, celf a chrefft, canfod olion bysedd, sesiynau ysgol goedwig a gweithdy pBuzz, tra bod disgyblion ysgol uwchradd hefyd wedi cael cyfle i archwilio gwahanol agweddau ar fywyd milwrol mewn pentref milwrol pwrpasol.
Cafodd rhieni a fynychodd y digwyddiad ysgol gynradd gyfle hefyd i siarad â chynrychiolwyr o sawl gwasanaeth sy'n darparu cymorth a chefnogaeth i blant y lluoedd i rannu eu profiadau ac annog ysgolion i ymgysylltu'n fwy â'u cymuned Lluoedd Arfog.
“Mae rhoi cyfle i blant rannu eu profiadau gydag eraill sydd mewn sefyllfaoedd tebyg yn wych, ac rwy'n falch iawn o'u gweld yn cael hwyl ac yn gwneud ffrindiau newydd. “Mae'r digwyddiad hwn yn ffordd addysgol ond ysgogol i blant ddysgu am waith tîm a meithrin sgiliau allweddol fel cyfathrebu a datrys problemau. “Fel gydag unrhyw ddigwyddiad, mae cymorth ariannol yn hanfodol, a hoffwn ddiolch i Cefnogi Plant y Lluoedd mewn Addysg (SSCE Cymru) am eu cyllid, a Centregreat am gefnogi ysgolion gyda chostau trafnidiaeth. Hoffwn hefyd ddiolch i'r holl ddarparwyr a'n helpodd i drefnu digwyddiad mor werthfawr, a fydd heb amheuaeth o fudd i lawer o bobl ifanc yn y fwrdeistref sirol. “Rwyf hefyd yn falch o allu cynnal y digwyddiad yng Nghanolfan Milwyr wrth Gefn Pen-y-bont ar Ogwr am y tro cyntaf.”
“I ddathlu Wythnos y Lluoedd Arfog, cynhaliodd y tîm anhygoel yng Nghyngor Sir Pen-y-bont ar Ogwr yr hyn sydd bellach wedi dod yn Ŵyl Lluoedd flynyddol dros ddau ddiwrnod gwych. “Daeth y digwyddiad â chyfanswm o 182 o blant o 20 ysgol leol at ei gilydd, gan gynnwys 125 o blant y lluoedd, gan roi cyfle iddynt gysylltu, chwerthin a mwynhau ystod eang o weithgareddau diddorol. “Hoffai SSCE Cymru ddiolch o galon i Gyngor Sir Pen-y-bont ar Ogwr am eich cefnogaeth ragorol — mae hon yn enghraifft ddisglair o sut y gall cais llwyddiannus i Gronfa SSCE Cymru ddod â chymunedau lleol at ei gilydd a chreu atgofion parhaol i'n pobl ifanc.”