O 01 Mai i 30 Medi mae cŵn yn cael eu gwahardd oddi ar nifer o draethau ym Mwrdeistref Sirol Pen-y-bont ar Ogwr - Gwahardd cŵn oddi ar draethau
Môr o hwyl yn Cosy Corner!
Dydd Iau 10 Ebrill 2025
Ymgasglodd pwysigion lleol, gan gynnwys Chris Elmore AS, Sarah Murphy AoS, ac Arweinydd Cyngor Bwrdeistref Sirol Pen-y-bont ar Ogwr, y Cynghorydd John Spanswick, i lansio agoriad swyddogol yr ardal chwarae hygyrch i blant newydd wedi'i ysbrydoli gan y môr yn Cosy Corner, sydd wedi’i leoli yn ardal boblogaidd glan môr Porthcawl.
Roedd teuluoedd yn disgwyl yn eiddgar wrth yr ymylon, wrth i Arweinydd y cyngor, John Spanswick, dorri'r rhuban i nodi agoriad yr ardal, sy'n cynnig adeiledd chwarae mawr siâp morfilod sy'n ganolbwynt i’r cyfan. Mae’r dyluniad pwrpasol gan Proludic, cwmni o'r DU sydd â phrofiad o weithgynhyrchu a chyflenwi offer maes chwarae, yn golygu mai hwn yw'r unig faes chwarae morfil o'i fath yng Nghymru, gyda dim ond un arall wedi'i leoli yn Lloegr.
Wedi'i gyflwyno gan y Tîm Gwella Mannau Gwyrdd a'i hwyluso gan Arian Ffyniant Cyffredin Llywodraeth y DU, mae'r ardal chwarae yn addas ar gyfer hyd at 70 o blant ar y tro, ac mae hefyd yn cynnwys cyfres o rwydi dringo, llwyfannau, sleidiau a grisiau sy’n cyd-gloi, yn ogystal â chyfleusterau chwarae hygyrch ychwanegol, gan gynnwys nodweddion llai ar thema cychod a phaneli chwarae rhyngweithiol.
Mae'r digwyddiad yn nodi cwblhau adfywio Cosy Corner, cynllun sydd wedi costio £3m yn gyffredinol. Mae'r datblygiad eisoes wedi darparu tirlunio gwastad helaeth, cyflwyno chwe uned fasnachol newydd, seddi cyhoeddus newydd, canopi pob tywydd, man agored ar gyfer digwyddiadau awyr agored, toiledau cyhoeddus, a chyfleusterau newid i ddefnyddwyr y marina gerllaw.
“Rydym wedi cyffroi bod yr ardal chwarae newydd i blant yn barod i deuluoedd ei fwynhau, gyda llawer o'r dyluniadau yn adlewyrchu syniadau a gynigir gan blant ysgol lleol. “Mae'r ardal chwarae wedi’i lleoli’n gyfleus ym mhen uchaf y safle, gan sicrhau bod digon o fannau agored gwyrdd ar gael o hyd i gynnal ystod o weithgareddau diwylliannol sydd wedi'u cynllunio ar gyfer misoedd y gwanwyn a'r haf. Rydym mor ffodus i gael y man newydd hwn, sydd bellach yn cynnig profiad cyflawn i deuluoedd ifanc sy'n ymweld â Cosy Corner.”
“Mae'r ardal chwarae plant ar thema forol yn ychwanegiad gwych at Cosy Corner. Mae ei nodwedd morfil pwrpasol bron yn unigryw i Borthcawl ac yn gwahodd plant o bob gallu i ddefnyddio eu dychymyg a chymryd rhan mewn chwarae corfforol, creadigol, awyr agored – rydym yn falch iawn o'r cyfleusterau yn yr ardal chwarae a sut maent yn ategu'n berffaith hunaniaeth arfordirol y dref. “Mae’r maes chwarae yn nodi carreg filltir i Borthcawl, a dyma'r prosiect olaf i gwblhau Cosy Corner, rhan o gynllun adfywio glannau'r dŵr – menter werth chweil, helaeth sy'n adlewyrchu ein hymrwymiad diwyro i les cymunedol ac adfywio economaidd.”
