Natur yn cael help llaw fel rhan o brosiect mannau naturiol newydd

Bydd trigolion ledled Bwrdeistref Sirol Pen-y-bont ar Ogwr yn gweld gwelliannau sylweddol i fannau gwyrdd lleol dros y 15 mis nesaf wrth i brosiect i greu lleoedd naturiol mwy croesawgar ddechrau.

Mae Cyngor Bwrdeistref Sirol Pen-y-bont ar Ogwr a Phartneriaeth Natur Leol Pen-y-bont ar Ogwr wedi derbyn bron i £962,000 gan Lywodraeth Cymru drwy raglen Lleoedd Lleol ar gyfer Natur 2025-27, sydd â'r nod o ddatblygu mannau naturiol newydd mewn rhannau trefol o'r fwrdeistref sirol.

Mae wedi'i chynllunio i gynnig ystod eang o fanteision megis dod â natur yn agosach at stepen drws pobl, cefnogi bywyd gwyllt a chysylltedd cynefinoedd, gwella iechyd a lles, annog mwy o ryngweithio cymdeithasol, meithrin cysylltiadau cymunedol cryfach, a chreu lleoedd mwy diogel a mwy deniadol i bobl eu mwynhau.

Mae'r rhaglen yn cynnwys nifer o brosiectau allweddol. Mae'r rhain yn cynnwys trawsnewid rhan ddyfrlawn o Gaeau Aber yn Nant-y-moel yn gymysgedd o wlyptir a choetir gyda banciau o flodau gwyllt brodorol, llwyfan wylio â seddi, a llwybrau hygyrch newydd.

Yng Nghoed Collwyn yn y Pîl, bydd y bartneriaeth yn gweithio ochr yn ochr â Chyngor Cymuned y Pîl i fynd i'r afael ag erydiad glannau'r afon ac i greu gofod naturiol newydd sbon i bobl leol ei fwynhau. Yn Sarn, bydd y prosiect yn gweithio gyda Valleys To Coast i ymgynghori â'r gymuned a darparu cyfleusterau newydd fel perllannau cymunedol, ardaloedd i dyfu bwyd, lle ar gyfer dysgu yn yr awyr agored, cynefinoedd newydd i beillwyr, plannu synhwyraidd, mynediad gwell a mwy.

Gan weithio gyda Tanio a Phartneriaeth Bwyd Cynaliadwy Pen-y-bont ar Ogwr, bydd y prosiect hefyd yn sefydlu cyfres o leoedd ledled y fwrdeistref sirol sy'n addas ar gyfer tyfu bwyd, ynghyd â gwelyau plannu a seilwaith angenrheidiol arall.

Yn olaf, bydd y prosiect yn dod â The Orchard Project, Ymddiriedolaeth Corfforaeth Cynffig, Parc Gwledig Bryngarw a byddin fach o wirfoddolwyr at eil gilydd i sefydlu perllannau ffrwythau treftadaeth newydd sbon ledled y fwrdeistref sirol.

Bydd y perllannau hyn yn chwarae rhan bwysig wrth helpu i ddadansoddi ac adnabod mathau anhysbys o ffrwythau, wrth gefnogi bioamrywiaeth a pheillio yn ogystal â chyfleoedd ar gyfer cynaeafu cymunedol, hyfforddiant a mwy.

Am ragor o wybodaeth neu i gyflwyno eich syniad eich hun, ewch i dudalen Partneriaeth Natur Leol Pen-y-bont ar Ogwr, cysylltwch â biodiversity@bridgend.gov.uk neu ewch i https://www.penybontarogwr.gov.uk/preswylwyr/natur-a-r-amgylchedd/grant-lleoedd-lleol-ar-gyfer-natur/