Padel, golff gwallgof, bwyd stryd a mwy wedi'i gynllunio ar gyfer glan y môr Porthcawl
Dydd Gwener 23 Hydref 2026
• Gwahoddiad i fusnesau lleol osod safleoedd dros dro yn Nhraeth Coney ar gyfer amrywiaeth newydd o gonsesiynau
• Cyfleoedd i symud i fannau parhaol wrth i ddatblygiad adfywio gael ei gyflwyno
• Glan y môr Porthcawl i gynnwys cyrtiau padel newydd, golff gwallgof, gwersi syrffio, bwyd stryd a mwy
Gallai cyrtiau padel, golff gwallgof, gwersi syrffio a bwyd stryd i gyd fod ar lan y môr ym Mhorthcawl mor gynnar â'r haf nesaf wrth i fusnesau lleol gael gwahoddiad i gofrestru eu diddordeb mewn rhedeg safleoedd dros dro a hamdden dros dro yn Nhraeth Coney.
Y nod yw cadw glan y môr ar agor, yn brysur a chroesawgar tra bod cynlluniau tymor hwy ar gyfer adfywio'r glannau yn symud ymlaen. Gallai'r defnydd dros dro hefyd roi cyfle i fusnesau lleol sefydlu eu hunain, gyda'r potensial i rai symud i fannau parhaol wrth i'r datblygiad ehangach fynd rhagddo.
Mae Cyngor Bwrdeistref Sirol Pen-y-bont ar Ogwr yn edrych ar gyfleoedd i gyflwyno cymysgedd o gyfleusterau hamdden dros dro ac atyniadau i deuluoedd, gan gynnwys ardaloedd chwarae i blant, gyda'r potensial i'r cynnig newid o un tymor i’r llall, gan roi rheswm i bobl barhau i ddychwelyd.
Disgwylir i'r safle gael ei glirio erbyn diwedd mis Mawrth, gan baratoi'r ffordd i'r defnydd newydd cyntaf agor, yn amodol ar y gofynion cynllunio perthnasol. Bydd y strategaeth hamdden a gyflwynir gyda'r cais cynllunio, sy'n nodi'r cynllun hirdymor ar gyfer pob defnydd, ar gael yn https://porthcawlwaterfront.co.uk/cy/
Mae'r cyngor yn gwahodd busnesau a allai helpu i ddod â'r syniadau hyn yn fyw i gofrestru eu diddordeb, gan gynnwys busnesau bwyd a diod symudol, darparwyr chwaraeon a hamdden, a'r rhai sydd â diddordeb mewn gweithredu o unedau symudol neu gynwysyddion.
Nid oes unrhyw weithredwyr wedi'u dewis eto, gyda'r cymysgedd terfynol o ddefnydd yn dibynnu ar lefel y diddordeb, sut mae'r cynigion yn datblygu ac unrhyw ofynion cynllunio perthnasol.
Mae gwaith paratoi ar y safle ar y gweill ar hyn o bryd o dan hawliau a chaniatâd presennol. Mae'r gwaith hwn ar wahân i'r penderfyniad cynllunio ar uwchgynllun ehangach Glannau Porthcawl, sy'n parhau i gael ei ystyried.
"Mae Porthcawl yn falch o'i glan môr, ac roedd ein cyhoeddiad diweddar am gadw'r Buccaneer yn rhan o amddiffyn hynny. Y cam nesaf yw sicrhau bod glan y môr yn aros ar agor ac yn brysur i'r bobl sy'n byw yma a'r ymwelwyr sy'n parhau i ddod yn ôl, tra bod cynlluniau ar gyfer y glannau ehangach yn mynd rhagddynt. "Rydyn ni'n awyddus i glywed gan fusnesau lleol a allai helpu i gyflwyno cymysgedd o hamdden, bwyd a diod a gweithgareddau teuluol yn Nhraeth Coney. Mae hyn yn golygu bod glan y môr yn parhau i wasanaethu pobl trwy gydol y gwaith. Mae'n gadael i ni gadw'r cynnig yn ffres ac yn rhoi llwybr i'r busnesau sy'n gwneud yn dda gael lle parhaol ar y glannau gorffenedig. "Bydd rhoi cyfle i fusnesau lleol gymryd rhan yn rhan bwysig o ddatblygu cynnig dros dro sy'n gweithio i Borthcawl a'i hymwelwyr."
Mae'r cyhoeddiad yn dilyn y newyddion diweddar bod The Buccaneer, adeilad hanesyddol glan y môr o'r 1930au, sydd wedi gwasanaethu fel caffi, parlwr hufen iâ a bar lleol poblogaidd, wedi cael ei achub rhag cael ei ddymchwel gan y cyngor a Llywodraeth Cymru.
Mae cynlluniau bellach yn symud ymlaen i adfer ei nodweddion pensaernïol gwreiddiol a’i alluogi i gael ei ddefnyddio gan y cyhoedd unwaith eto, gyda defnydd posibl yn y dyfodol yn cynnwys bwyty neu gaffi, siopau a chiosgau.
Gall busnesau sydd â diddordeb mewn cymryd rhan ddarganfod mwy a chofrestru eu diddordeb drwy gysylltu â Sandybay@bridgend.gov.uk. Mae ymarfer mynegi diddordeb ffurfiol yn cael ei baratoi, a bydd mwy o wybodaeth ar gael yn fuan.
Mae mwy o wybodaeth am gynigion ehangach y glannau ar gael yn https://porthcawlwaterfront.co.uk/cy/
