Ysgol Gyfun Pencoed yn derbyn gwobr am y cymorth a gynigir i blant y Lluoedd Arfog

Mae Cefnogi Plant Milwyr mewn Addysg yng Nghymru (SSCE Cymru) wedi dyfarnu Gwobr Ysgolion sy’n Ystyriol o’r Lluoedd Arfog Efydd i Ysgol Gyfun Pencoed am y gefnogaeth werthfawr a gynigir i blant milwyr yn yr ysgol.

Mae SSCE Cymru yn gweithio gydag ysgolion i ymgorffori arfer da wrth gefnogi plant milwyr; gan greu amgylchedd cadarnhaol iddynt rannu profiadau, yn ogystal ag annog lleoliadau addysgol i ymgysylltu'n fwy â chymuned y Lluoedd Arfog.  Mae'r sefydliad yn cynnig tair lefel o wobrau i ysgolion weithio tuag atynt, sef efydd, arian ac aur, ac mae maen prawf ar gyfer pob un.

Mae Ysgol Gyfun Pencoed wedi mynd ati mewn amryw o ffyrdd i helpu eu dysgwyr sy’n blant i filwyr, gan gynnwys cyfarfod grŵp SSCE bob pythefnos i roi cyfle i ddysgwyr drafod unrhyw bryderon neu brofiadau, yn enwedig pan fydd rhiant/anwylyd wrthi’n gwasanaethu.  Mae disgyblion yn rhannu strategaethau ymdopi cadarnhaol, yn ogystal â chymryd rhan mewn sesiynau meithrin tîm a gweithgareddau yn yr ystafell ddosbarth, gan helpu i ddatblygu sgiliau arwain a chynnig y cyfle i’r disgyblion sy’n blant i filwyr y Lluoedd Arfog ffynnu.

Mae gan Edward Jones, y Pennaeth, a Mrs Etta Bishop, arweinydd SSCE yr ysgol, brofiad ymarferol o fywyd milwrol eu hunain, sy'n eu galluogi i gefnogi'r dysgwyr o safbwynt unigryw a chydag empathi. 

Yn blentyn y Lluoedd Arfog ac yn ddiweddarach yn wraig i filwr, yn ogystal â deall profiadau plant milwyr, mae Mrs Bishop, sydd wedi bod yn rhedeg y grŵp SSCE ers pum mlynedd, hefyd yn gallu uniaethu ag amgylchiadau'r rhieni, gan ganiatáu iddi feithrin perthynas werthfawr â’r teuluoedd.

Dywedodd Mr Edward Jones: "Yn blentyn y lluoedd fy hun, roedd fy nhad yn Swyddog Gwarant (WO1) yn y REME (Peirianwyr Trydanol a Mecanyddol Brenhinol), ac rwy’n cofio pa mor anodd oedd symud ysgol yn ôl o'r Alban i Gymru yn y 1970au.  Fel ysgol, rydym yn cydnabod pwysigrwydd cymorth o safon i sicrhau bod plant y Lluoedd yn cael eu croesawu'n effeithiol, gan eu helpu i integreiddio i'n cymuned ysgol yn gyflym, yn ogystal â sicrhau ein bod yn diwallu eu hanghenion lles ac academaidd."

Dywedodd aelod o Flwyddyn 9 o'r grŵp SSCE: "Mae'n braf bod yn rhan o grŵp lle mae pobl yn mynd trwy'r un peth - mae'n ei gwneud hi'n haws cysylltu â nhw, yn wahanol i rai ffrindiau eraill nad ydynt efallai'n deall sut beth yw cael tad i ffwrdd yn y lluoedd."

Ychwanegodd dysgwr arall sy’n blant i filwr: "Rwy'n hoffi bod yn rhan o grŵp y Lluoedd oherwydd mae'n rhoi ychydig o gefnogaeth ychwanegol i bobl gan yr ysgol ac yn eu helpu i ddysgu sut i gefnogi eu teuluoedd a allai hefyd fod yn ei chael hi’n anodd yn emosiynol."

Yn ddiweddar, derbyniodd Ysgol Gyfun Pencoed gydnabyddiaeth bellach o'i hymdrechion ar ôl cael ei dewis i fynd i Gynhadledd Flynyddol Cynghrair SSCE yng Nghaerdydd, lle gofynnwyd i ddysgwyr drafod eu profiadau personol fel plant milwyr.