Cyngor Ieuenctid Pen-y-bont ar Ogwr
Mae’r corff hwn yn rhoi llais i bobl ifanc ym Mwrdeistref Sirol Pen-y-bont ar Ogwr. Os ydych yn dod ar draws mater pwysig sy’n effeithio ar bobl ifanc yn yr ardal, byddwn yn brwydro i fynd i’r afael ag ef.
Mae Cyngor Ieuenctid Pen-y-bont ar Ogwr yn cynnwys:
- Maer Ieuenctid
- Dirprwy Faer Ieuenctid
- Aelodau o’r Cabinet
- Cynghorwyr Ieuenctid
Mae’r corff wedi’i sefydlu gan bobl ifanc lleol ac yn cael ei redeg ganddynt. Mae’n endid cwbl ar wahân i Gyngor Bwrdeistref Sirol Pen-y-bont ar Ogwr.
Aelodau o’r Cabinet Ieuenctid
- Eco a Chynaliadwyedd - Gwag ar hyn o bryd
- Llesiant a Chydraddoldeb Ieuenctid – Gwag ar hyn o bryd
- Addysg – Gwag ar hyn o bryd
- AS Ieuenctid y DU ar gyfer Pen-y-bont ar Ogwr – Aspen Whiting
- Aelod Seneddol Ieuenctid Cymru dros Ben-y-bont ar Ogwr – Gwag ar hyn o bryd
Maer Ieuenctid: Phoebe Evans
Blaenoriaethau Phoebe yw:
- Iechyd meddwl – Gwneud cymorth yn fwy gweladwy a hygyrch mewn ysgolion a chymunedau, a helpu pobl ifanc i deimlo'n fwy cyfforddus i siarad.
- Yr amgylchedd – Cefnogi mentrau ecogyfeillgar ac annog prosiectau dan arweiniad ieuenctid sy'n hyrwyddo cynaliadwyedd ac yn gofalu am ein gofodau lleol.
- Addysg – Sicrhau bod myfyrwyr o bob gallu yn teimlo eu bod yn cael eu cefnogi, a hyrwyddo gwahanol gyfleoedd dysgu addas i ystod o ddiddordebau a dyheadau at y dyfodol—nid dim ond un llwybr.
Dirprwy Faer Ieuenctid: Adam Cloutier
Blaenoriaethau Adam yw:
- Darparu mwy o gyfleoedd ar gyfer prentisiaethau a phrofiad gwaith
- Dechrau caniatáu i bobl ifanc gymryd rhan mewn gwaith diogel ac addas os ydyn nhw’n dymuno, e.e. gweithio yn siop y gornel, gwaith swyddfa, gwaith ar-lein ac ati tra hefyd yn gweithredu polisïau i sicrhau bod pobl ifanc yn yr amgylcheddau hyn yn ddiogel ac nad ydynt yn cael eu hecsbloetio.
- Cynaliadwyedd economaidd ac amgylcheddol
Beth sy'n digwydd yn y Cyngor Ieuenctid?
Rydym yn cynnal cyfarfodydd y Cyngor Ieuenctid yn rheolaidd dwywaith y mis - un cyfarfod ar-lein ac un cyfarfod wyneb yn wyneb yn y swyddfeydd dinesig ym Mhen-y-bont ar Ogwr.
Mae gwesteion arbennig o sefydliadau eraill a gweithwyr proffesiynol o Gyngor Bwrdeistref Sirol Pen-y-bont ar Ogwr yn cael gwahoddiad i’r cyfarfodydd. Mae’r cyfarfodydd yn cynnwys ymgynghoriadau a chynllunio ymgyrchoedd. Mae pawb yn cael cyfle i gadeirio cyfarfodydd y Cyngor Ieuenctid ac i gymryd cofnodion.
A ydych yn ansicr am ymuno â’r Cyngor Ieuenctid? Dewch draw i un o’n digwyddiadau cymdeithasol i gwrdd ag aelodau’r cyngor mewn ffordd anffurfiol.
Mae’r cyngor ieuenctid yn cyfarfod unwaith y mis i fwynhau digwyddiad cymdeithasol. Dim cyfarfodydd, ymgynghoriadau nag agendau, yn hytrach hwyl a’r cyfle i sgwrsio.
Rydym yn rhoi cyfle i bawb gynnal digwyddiad cymdeithasol ac i rannu sgil. Er enghraifft: noson gemau, celff a chrefft a chymaint mwy!
Roedd y Cyngor Ieuenctid eisiau dylunio ymgyrch i addysgu eu cyfoedion ar y pynciau sy’n bwysig iddyn nhw. Er enghraifft: iechyd meddwl, newid yn yr hinsawdd ac addysg wleidyddol (tair prif flaenoriaeth y Cyngor Ieuenctid).
Mae aelodau'r cyngor yn dod at ei gilydd i ddysgu am y pwnc ac yna'n cynllunio gweithdai hwyliog a diddorol i'w cyflwyno i'w cyfoedion, eu hathrawon, rhieni a chymuned Pen-y-bont ar Ogwr.
Diddordeb mewn bod yn addysgwr cyfoedion? Cysylltwch â ni i fod yn rhan o’r ymgyrch addysg cyfoedion!
Dwi eisiau bod yn rhan o’r Cyngor Ieuenctid!
Mae’r broses recriwtio ar gyfer y Cyngor Ieuenctid yn syml iawn:
- Mae Cyngor Ieuenctid Pen-y-bont ar Ogwr yn agored i bob person ifanc 11-25 oed sy’n byw ym Mhen-y-bont ar Ogwr neu sy’n mynd i’r ysgol yn y sir.
- Ar hyn o bryd, mae gennym bobl ifanc o bob rhan o Ben-y-bont ar Ogwr o wahanol ysgolion a cholegau neu’n cael eu haddysgu gartref.
- Rydym yn cynnal cyfarfodydd wyneb yn wyneb ac ar-lein. Cynhelir ein cyfarfod wyneb yn wyneb ar y trydydd dydd Mercher o bob mis yn y Swyddfeydd Dinesig ym Mhen-y-bont ar Ogwr.
I gael rhagor o wybodaeth neu i ddod yn aelod o’r cyngor, cysylltwch â:
Rhoi gwybod am fater
Os byddwch yn dod ar draws mater pwysig sy’n effeithio ar ieuenctid yr ardal, byddwn yn brwydro i wneud iddo ddigwydd. I godi unrhyw fater neu i leisio barn am eich ardal leol, cysylltwch â:
Straeon o’r Cyngor Ieuenctid
Roedd M yn aelod o’r Cyngor Ieuenctid ac ymgeisiodd i fod yn Faer Ieuenctid.
Cafodd ei hethol a gwasanaethodd fel Maer Ieuenctid am ei thymor. Cymerodd ran mewn nifer o fentrau, megis gweithio gyda Llywodraeth Cymru, Tîm Comisiynydd yr Heddlu a Throseddu ac arwain ar fentrau Urddas Mislif ar gyfer Pen-y-bont ar Ogwr.
Mae M bellach yn y Brifysgol yn astudio Gwleidyddiaeth a Chysylltiadau Rhyngwladol. Cyrhaeddodd rownd derfynol gwobr Actifydd Ifanc y Flwyddyn yn 2022!
Mae hi’n edrych ymlaen at ddilyn gyrfa yn y Gyfraith.
G oedd ein Dirprwy Maer Ieuenctid ac mae wedi ennill Gwobr Dinasyddiaeth y Maer.
Mae hyn oherwydd ei fuddugoliaeth anhygoel yn ennill Gwobr fawreddog Diana, am ei waith cymunedol rhagorol yn datblygu a darparu Hyfforddiant Ymwybyddiaeth Traws i bobl ifanc, rhieni a gweithwyr proffesiynol ledled De Cymru ac yn helpu i arwain ar greu Grŵp Ieuenctid YPOP LGBTQIA+ ym Mhen-y-bont ar Ogwr.
Sefydlwyd YPOP ar ôl canfod angen ymhlith pobl ifanc yn ystod cyfnodau clo’r pandemig.
Gwnaethom ddatblygu Lle Diogel LGBTQIA+ ar-lein i Bobl Ifanc gael ymlacio a chwrdd â phobl ifanc ledled y sir. Mae ein sesiynau’n cynnwys siaradwyr gwadd, gweithdai, nosweithiau Cosplay a Nosweithiau Cwis.
Mae aelodau wedi bod yn gweithio ar brosiectau fel datblygu eu Polisi LGBTQIA+ a’u Polisi Ymwybyddiaeth Traws eu hunain a phrosiect celf gymunedol. Tynnwyd sylw at y grŵp gan Sarah Murphy AS yn y Senedd fel man diogel y mae mawr ei angen ac i’w groesawu ar gyfer pobl ifanc ym Mhen-y-bont ar Ogwr.
Rydym yn cyfarfod yn wythnosol wyneb yn wyneb yn y Ganolfan Ieuenctid, Neuadd Bytholwyrdd, bob nos Lun rhwng 4pm a 6pm; ar gyfer pobl ifanc 12-17 oed.