Casgliadau gwastraff ac ailgylchu gŵyl y banc: Ni fydd casgliadau ar Ddydd Llun 25 Awst 2025. Bydd y casgliadau’n digwydd ddiwrnod yn hwyrach na’r arfer ar gyfer yr wythnos tan ddydd Sadwrn 30 Awst 2025.
Cyngor yn rhoi cynlluniau ar waith wrth i’r Swyddfa Met gyhoeddi rhybudd tywydd am eira a rhew
Dydd Mawrth 07 Mawrth 2023
Mae’r Swyddfa Met wedi cyhoeddi rhybudd tywydd melyn am eira a rhew posibl yn ne Cymru, gyda’r rhybudd yn cynnwys Bwrdeistref Sirol Pen-y-bont ar Ogwr.
Mae cynlluniau wedi'u rhoi ar waith gan y cyngor i ymdopi ag effaith amhariad posibl a chynghorir trigolion i ymweld â sianeli cyfryngau cymdeithasol a gwefan y cyngor i gadw ar flaen y datblygiadau diweddaraf.
Os yw pennaeth yn penderfynu nad oes modd agor ysgol, bydd yn sicrhau bod disgyblion, rhieni a gofalwyr yn cael gwybod cyn gynted â phosibl drwy’r dull cyfathrebu arferol. Bydd tudalen ysgolion ar gau bwrpasol y cyngor hefyd yn cael ei diweddaru.
Mae'r cyngor yn paratoi drwy storio dros 5,000 tunnell o halen ac mae cynlluniau ar waith ar gyfer ailgyflenwi stoc yn ystod pyliau hir o dywydd garw gaeafol.
Pan fydd y tymheredd yn gostwng, mae’r cyngor yn rhag-drin y rhannau mwyaf prysur o’r rhwydwaith ffyrdd â halen craig gronynnog er mwyn atal rhew rhag ffurfio, a gall alw ar nifer o gerbydau a ddyluniwyd yn arbennig fel graeanwyr i gadw ffyrdd yn glir.
Unwaith mae eira wedi syrthio, mae'n rhaid clirio llwybrau gydag erydr cyn y gellir eu trin. Ar lwybrau cerdded, mae'r cyngor yn defnyddio offer arbenigol sy’n helpu i ddadmer rhew, ac mae gweithwyr hefyd yn clirio eira â llaw ac yn defnyddio chwythwyr eira.
Cyn dechrau pob tymor gaeaf, caiff y biniau eu llenwi â chymysgedd o halen a thywod miniog sydd ar gael i’w ddefnyddio gan breswylwyr a modurwyr i’w gwneud hi’n haws teithio drwy strydoedd lleol pan fydd yr amodau’n dirywio.
Mae staff y cyngor yn gweithio bob awr o’r dydd, yn aml dan amodau ofnadwy, i gynnig gwasanaethau a chadw'r fwrdeistref sirol yn symud mor ddiogel â phosibl. Mae’r cyngor wedi rhoi cynlluniau ar waith ar gyfer gwasanaethau rheng flaen fel Gofal yn y Cartref neu gasgliadau gwastraff ac ailgylchu ar y palmant, a bydd yn cyhoeddi gwybodaeth benodol am wasanaethau o’r fath yn ddibynnol ar ddifrifoldeb yr amodau ac am ba hyd mae disgwyl iddynt barhau. Mae sawl rheswm pam y gallai pennaeth benderfynu bod angen cau ysgol yn ystod tywydd garw, ac nid oes angen eira trwm i hyn ddigwydd bob tro. Weithiau, gall ysgol methu ag agor oherwydd bod pibellau wedi rhewi, ac mewn perygl o fyrstio, neu oherwydd nad yw staff wedi gallu teithio o ardaloedd eraill lle mae mwy o eira wedi disgyn. Cau ysgol yw’r dewis Mewn sefyllfaoedd lle mae angen cau ysgol, mae’r awdurdod yn ceisio dychwelyd i wasanaeth arferol cyn gynted ag y bo modd yn ddiogel.
Am ragor o fanylion, cynghorir trigolion i ymweld â thudalen we tywydd y gaeaf y cyngor, sy’n cynnig digon o gyngor a gwybodaeth ddefnyddiol, gan gynnwys atebion i gwestiynau cyffredin.