Gwirio gwybodaeth
Ar adeg pan fo newyddion a gwybodaeth yn teithio'n gyflymach nag erioed, mae'n dod yn fwyfwy anodd gwybod beth sy’n gywir, yn ddibynadwy ac yn rhywbeth y gallwch ymddiried ynddo.
Boed yn dod ar eu traws yn bersonol, ar y cyfryngau cymdeithasol neu ar y rhyngrwyd ehangach, gall gwybodaeth anghywir yn aml achosi dryswch a phryder mewn cymunedau lleol.
Mae'n tanseilio ymddiriedaeth y cyhoedd a gall hyd yn oed atal preswylwyr rhag cael mynediad at wasanaethau allweddol neu rannu eu barn yn ystod ymgynghoriad.
Bwriad y dudalen hon yw sicrhau bod gennych fynediad at wybodaeth ffeithiol gywir am wasanaethau a pholisïau'r cyngor a'ch bod yn gallu gwneud penderfyniadau gwybodus.
Bydd yn cael ei ddiweddaru'n rheolaidd gyda gwybodaeth gyfredol a chywir am faterion cyfoes sy'n effeithio ar Fwrdeistref Sirol Pen-y-bont ar Ogwr.
Cyllideb
Rhifynnau diweddaraf: Y Dreth Gyngor, ardrethi busnes a chyllid
Ydy'r cyngor yn cael ei ariannu'n llwyr gan y dreth gyngor?
Nac ydy, dim ond tua 20% o gyllideb net gyfan y cyngor sy'n cael ei ariannu gan dreth y cyngor. Mae'r rhan fwyaf o’r gwasanaethau’n cael eu hariannu gan Grant Cynnal Refeniw gan Lywodraeth Cymru.
Pam nad yw'r cyngor yn lleihau ardrethi busnes neu’n gostwng rhenti siopau?
Nid y cyngor sy’n pennu ardrethi busnes - maen nhw’n cael eu pennu gan Lywodraeth Cymru - ac mae lefelau rhent yn cael eu gosod gan landlordiaid preifat.
Caiff ardrethi busnes eu cyfrifo trwy luosi gwerth ardrethol eiddo â'r ‘lluosydd’ ardrethi annomestig cyfredol. Mae'r lluosydd yn cael ei osod gan Lywodraeth Cymru bob blwyddyn.
Ydy staff y cyngor wedi'u heithrio rhag talu'r dreth gyngor?
Nac ydyn – myth yw hwn. Rhaid i bob aelod o staff sy'n byw ym Mwrdeistref Sirol Pen-y-bont ar Ogwr dalu'r dreth gyngor fel pob preswylydd arall.
Pam mae'r cyngor yn cadw arian yn ei gronfeydd wrth gefn yn hytrach na'i wario?
O dan y gyfraith, mae’n rhaid i gynghorau gael cronfeydd wrth gefn. Arian yw hyn sydd wedi'i neilltuo at ddibenion ei wario ar weithgareddau penodol neu yn ystod argyfwng.
Gellir gwario cronfeydd wrth gefn unwaith yn unig ac mae dau gategori o arian wrth gefn.
Mae cronfeydd wrth gefn sydd wedi'u clustnodi yn talu am brosiectau sydd wedi’u cynllunio, fel adeiladu ysgolion newydd neu adfywio canol trefi.
Mae cronfeydd wrth gefn brys yn cynnwys cronfeydd wrth gefn ar gyfer sefyllfaoedd brys fel delio â llifogydd neu ddifrod tywydd garw.
Byddai gwario'r cronfeydd wrth gefn ar unrhyw bwrpas arall yn golygu nad oes arian i'w fuddsoddi mewn e.e. ysgolion newydd, gan adael preswylwyr ac eiddo yn agored i niwed ac mewn perygl.