Gostyngiadau treth gyngor

Gostyngiad person sengl

Os mai dim ond un oedolyn sy’n byw mewn eiddo, mae posib dyfarnu gostyngiad o 25%.

Os ydych chi’n gymwys ond heb gael gostyngiad, gwnewch gais drwy’r botwm uchod.

Pobl y gellir eu diystyru ar gyfer y dreth gyngor

Efallai y gall y categorïau isod o bobl gael eu diystyru at ddibenion y dreth gyngor. Efallai y bydd gostyngiad o 25% neu 50% ar gael ar gyfer:

• myfyrwyr llawn amser, myfyrwyr nyrsio, hyfforddeion cynlluniau hyfforddi i ieuenctid a phrentisiaid
• cleifion ysbytai preswyl
• pobl sy’n derbyn gofal mewn cartrefi gofal
• pobl sydd ag amhariad gwybyddol sylweddol
• pobl sy’n aros mewn rhai hosteli neu lochesi dros nos
• ieuenctid 18 ac 19 oed sydd yn yr ysgol neu newydd adael yr ysgol
• gweithwyr gofal ar gyflog isel sy’n cael eu cyflogi gan elusen fel rheol
• pobl yn y carchar
• aelodau o gymunedau crefyddol, sy’n golygu mynachod neu leianod
• pobl sy’n gofalu am rywun ag anabledd nad yw’n briod, partner, neu fab neu ferch dan 18 oed

Gostyngiad ar gyfer amhariad gwybyddol sylweddol

Gall rhywun ag amhariad gwybyddol sylweddol sy'n byw ar ei ben ei hun neu dim ond gydag eraill sydd ag amhariad gwybyddol sylweddol hawlio gostyngiad o 100% o’r dreth gyngor. 

Os ydyn nhw’n byw gyda pherson arall heb amhariad gwybyddol sylweddol, gall yr aelwyd honno hawlio gostyngiad o 25% o’r dreth gyngor. 

Fodd bynnag, os yw rhywun ag amhariad gwybyddol sylweddol yn byw gyda dau neu fwy o oedolion nad oes ganddynt amhariad gwybyddol, nid oes gostyngiad.

Mae posib ôl-ddyddio’r gostyngiad hwn i ddyddiad y diagnosis, fel y cadarnheir gan y meddyg a thrwy dderbyn hawl i fudd-daliadau perthnasol.

Cymhwysedd ar gyfer y gostyngiad amhariad gwybyddol sylweddol

I hawlio'r gostyngiad amhariad gwybyddol sylweddol, mae angen i rywun fod:

• wedi'i ardystio fel rhywun ag amhariad gwybyddol sylweddol gan feddyg
• yn gymwys am un o’r budd-daliadau sydd wedi’u rhestru ar dudalen Llywodraeth Cymru ar y we am ostyngiad ar gyfer nam meddyliol difrifol

Pobl sy’n gadael gofal

Gall rywun sy’n gadael gofal gael ei eithrio rhag gorfod talu Treth y Cyngor os yw’n byw ar ei ben ei hun neu gyda phobl eraill sy’n gadael gofal neu fyfyrwyr yn unig.

Os yw’n byw gydag oedolion eraill, gall fod yn gymwys i gael gostyngiad diystyru o 25%.

Mae’r Rheoliadau’n diffinio person sy’n gadael gofal fel person sy’n -

• 24 oed neu’n iau (nid yw’n gymwys o’i ben-blwydd yn 25 oed); ac sy’n
• Berson ifanc yng nghategori 3 fel a diffinnir gan Adran 104 Deddf Gwasanaethau Cymdeithasol a Llesiant (Cymru) 2014.

Gallwch wneud cais ar-lein, yn gyntaf bydd angen i chi fewngofnodi/cofrestru ar gyfer Fy Nghyfrif i gael mynediad i borth Treth y Cyngor, dewiswch Gwasanaethau ac yna'r ffurflen gais Gadawyr Gofal.

Cysylltu

Os oes gennych unrhyw ymholiadau ynghylch eich treth gyngor, cysylltwch â ni drwy ddefnyddio ein ffurflen ar-lein.