Dod yn gynghorydd
Mae cynghorwyr yn cael eu hethol gan bobl yn eu cymuned i'w cynrychioli a gwneud penderfyniadau ar eu rhan. Mae bod yn gynghorydd yn rhoi boddhad, yn heriol ac yn bleserus a gallwch chi newid bywydau pobl er gwell.
Gall unrhyw un bron fod yn gynghorydd, ac mae'n bwysig iawn bod ystod o wahanol bobl yn cael eu hethol i gynrychioli gwahanol gymunedau.
- Ydych chi'n poeni'n angerddol am eich cymuned leol?
- Oes rhywbeth rydych chi eisiau ei newid?
- Ydych chi'n barod i wneud penderfyniadau heriol?
Mae Cymru angen mwy o gynghorwyr sydd o dan 40 oed, benywaidd, anabl, LGBTQ +, Du neu Asiaidd neu o grwpiau lleiafrifol eraill ac o ystod o gredoau, diwylliannau ac amgylchiadau personol.
Yn gryno, rydym yn chwilio am fwy o gynghorwyr sydd mor amrywiol â'r cymunedau maent yn eu cynrychioli. Mae gan ymgeiswyr anabl hawl hefyd i gael cyllid i helpu gydag unrhyw gostau ychwanegol sy'n gysylltiedig â'u nam, a allai fod yn rhwystr sy’n eu hatal rhag sefyll fel cynghorydd.
Mae’r etholiadau llywodraeth leol nesaf yn cael eu cynnal ym mis Mai 2027. Bydd pecynnau enwebu ar gael yn gynnar yn 2027.
Cymhwysedd
Gallwch chi fod yn ymgeisydd os ydych chi:
- dros 18 oed
- ar y gofrestr etholiadol
- wedi byw, gweithio neu’n berchen ar eiddo yn y fwrdeistref sirol am y 12 mis diwethaf o leiaf.
Nid ydych yn gymwys neu gallwch gael eich gwahardd:
- os oes gennych swydd sydd wedi'i chyfyngu'n wleidyddol yn eu hawdurdod lleol neu mewn awdurdod arall.
- os ydych yn datgan eich bod yn fethdalwr neu’n datgan euogfarn flaenorol gyda dedfryd o dri mis neu fwy o garchar o fewn cyfnod o 5 mlynedd cyn ceisio cael eich ethol
Dylai darpar ymgeiswyr ofyn am eu cyngor cyfreithiol eu hunain os ydynt yn ansicr ynghylch a ydynt yn gymwys i sefyll.
Cymorth a Chanllawiau
Gallwch hefyd gael gwybod mwy am fod yn gynghorydd ym Mwrdeistref Sirol Pen-y-bont ar Ogwr drwy fynychu un o'n cyfarfodydd pwyllgor cyhoeddus neu siarad yn anffurfiol ag un o'n cynghorwyr presennol.
Darganfyddwch sut i ddod yn gynghorydd mewn sesiynau am ddim
Gydag etholiadau llywodraeth leol yn cael eu cynnal ym mis Mai 2027, mae Cyngor Bwrdeistref Sirol Pen-y-bont ar Ogwr yn trefnu sesiynau darpar ymgeiswyr lle gall preswylwyr ddarganfod mwy am ddod yn gynghorydd a sefyll mewn etholiad.
Yn digwydd rhwng 6pm ac 8pm ddydd Mawrth 13 Hydref a dydd Mercher 14 Hydref, mae'r sesiynau am ddim wedi'u trefnu i annog mwy o bobl i gymryd rhan yn y broses ddemocrataidd ac i ledaenu ymwybyddiaeth o rolau aelodau etholedig.