Fforwm Mynediad Lleol Pen-y-bont ar Ogwr

Gwnaeth Deddf Cefn Gwlad a Hawliau Tramwy 2000 (Deddf 2000) hi’n ofynnol i Fforymau Mynediad Lleol (FfMLl) gael eu sefydlu ym mhob Awdurdod Lleol a Pharc Cenedlaethol yng Nghymru a Lloegr. 

Maent yn gyrff a sefydlwyd i gynghori ar wella mynediad y cyhoedd at dir yn eu hardal at ddibenion hamdden awyr agored a mwynhau'r ardal ac ar faterion eraill fel y rhagnodir gan Lywodraeth Cymru (Deddf 2000 Adran 94(4)) 

Sut cawsant eu sefydlu? 

Rhoddodd Deddf 2000 ddyletswydd statudol ar "awdurdodau penodi" i sefydlu FfMLl yn eu hardal. Sefydlodd Cyngor Bwrdeistref Sirol Pen-y-bont ar Ogwr eu FfMLl cyntaf ar 28 Tachwedd 2002, gan benodi aelodau â diddordebau a phrofiadau amrywiol o gerddwyr lleol i dirfeddianwyr, ffermwyr, marchogion, pobl gyffredin, a grwpiau diddordeb defnyddwyr eraill.

Mae'r Fforwm, ac felly aelodaeth ohono, yn para am 3 blynedd cyn i'r cyngor orfod ei ailsefydlu.

Gall aelodau'r fforwm ail-ymgeisio i ymuno â'r fforwm nesaf ond mae'r cyngor hefyd yn gwahodd datganiadau o ddiddordeb gan unigolion eraill sydd â diddordeb naill ai'n uniongyrchol neu drwy hysbysebu yn y wasg leol ac ar wefan y cyngor.

Bydd y Fforwm Mynediad Lleol 3 blynedd presennol (FfMLl 6) yn dod i ben ym mis Hydref 2026.  

Pwy maen nhw'n cynghori?

Swyddogaeth statudol Fforwm Mynediad Lleol Pen-y-bont ar Ogwr yw cynghori ar wella mynediad cyhoeddus i dir ym Mhen-y-bont ar Ogwr at ddibenion hamdden awyr agored a mwynhau’r ardal. 
Wrth gyflawni ei swyddogaethau, rhaid i FfMLl roi sylw i:

• anghenion rheoli tir
• dymunoldeb gwarchod harddwch naturiol yr ardal y mae wedi ei sefydlu ar ei chyfer, gan gynnwys planhigion, anifeiliaid a nodweddion daearegol a ffisiograffigol yr ardal
• Canllawiau a roddir o bryd i'w gilydd gan Lywodraeth Cymru.